Rev 18 | BDD | STEP | Ma wete 'aigeda anelose ya'iteya galewega 'idobidobima, tauna ma'ina loina madouna, ma wete 'ina 'asilalega bale'u 'i'asilala,

Revelation of John 18

Casa Babiloni 'ina be'u

1 Ma wete 'aigeda anelose ya'iteya galewega 'idobidobima, tauna ma'ina loina madouna, ma wete 'ina 'asilalega bale'u 'i'asilala, 2 ma 'enana madounega 'ibwauwa, “Casa madounaina Babiloni 'ibe'u pwaiya, ma Tomudulele ma'ina bodao ta wete bwasumo galadi ma didigadi sihe'asaeya, 3 weyahina Babiloni 'ina wainiyega boda mabwaiyadi 'ihenumediya, wainiina beno pui galana. Tauna gide toganawala. Coinega bale'u 'ana kiniyao ba'idadiu sipuiya, ma 'ina puiyedi 'oidiyega to'ahwa'uneyao 'idi wasawasa madouna silobaloba.”

4 Ma galewega wete 'aigeda 'enana yahesagoheya, 'igwaeya, “Cigu tomotaiyao 'asa beno 'alonega walatuma, 'amuge 'ina puiina 'oimiya 'ihabala ma 'ana maisa muyamuya waloba. 5 Weyahina 'ina pui 'ana madou gide tuwa galewa 'ina hane, ma 'ina mumuga galadiyedi weyahidi Yehoba 'inuwanuwatuhu ma 'abehega 'ihemaise.”

6 Ta wete aneloseina 'igwaeya, “Casa nage 'uhemaise, gide tuwa to'aha 'ina paihowa, ma 'uhemaise maluwa. Ma wete tauna 'ina waini galana maluwa 'u'ebwae, ma tauna 'inuma. 7 Ta wete 'ina gwae gagasa ma 'ina hemataganawala 'adi maisa 'u'ebwae, muyamuya ma dou, weyahina 'iboinamo 'oina 'igwaeya, ‘Taugu Kuini, geya wete hiwape 'ina tupwa 'oina yada miya, ma wete geya'abwa dou yalobaloba.’ 8 Coinega sabwelo 'aigeda 'oina mwauwedi 'abwa silatu, beno lohala madouna ma gomale, ta wete 'aiwe ninima 'i'alasi. Weyahina Badaina, tauna Yehoba Tohewaiwai hedade, wahineina 'ana maisa 'i'ebwae.”

9 Ma bale'u 'ana kiniyao, taudi wahineina ba'idadiu silogwaliya ta simiya hemataganawala, taudi wete 'asaina weyahina sidou ma sidougwaegwae, 'eguma 'asa 'i'ala'alasi, ma 'asuna si'ita. 10 Ta ma'idi matautaina muyamuya weyahina, 'oinega 'edasaliyana sitoholowa ma sigwae, “Caioi, 'aioi, 'asa madouna ma waiwaina Babiloni 'ana loina 'iloba mwamwayau.”

11 Ma wete bale'uwa to'ahwa'uneyao ma'idi nuwagala ta 'asaina weyahina sidouwa, weyahina geya 'eta taiya 'idi tobwatobwaedi 'ida gimwaneyediya. 12 Cidi tobwatobwaedi beno gide goula ma siliba, ta dimwa wasawasa ta 'epo ta 'ale'o wa'ewa'e'edi, ma 'ale'o wasawasa hebwehebwelidi, ma 'aiwe mahamahaidi, ma dona madoudi, ma 'aiwe bwebwe'adi gide gahi, ma kopa pwawati, ma dimwa wa'ewa'e'edi, 13 ma seyala, ma mwahadi, ma gado'a*, ma holowa, ma ginaula mahamahaina, ma waini, ma holowa ganinibu, ma witi, ma bulumakau, ma sipi, ma hosi, ma waga lisilisi, ta wete tomota mayawasidi sihegimwaneyedi ma 'abehega 'idi topaihowao.

14 Coinega to'uneyedi 'asaina 'oina sigwaeya, “Ginaulaedi mabwaiyadi nuwanuwau bo'i sigumwala, ta wete 'ino wasawasa ma 'a hepwatu mabwaiyana 'igumwala, nata geya'abwa wete 'ulobaloba hiladi.”

15 Ma to'ahwa'uneyedi, taudi 'idi wasawasa madoudi 'asaina 'oinega silobeya, sitotoholo 'edasaliyanega, weyahina 'asaina 'ina muyamuya si'iteya, ta simatauta, ta ma'idi 'atemuyamuya sidouwa, 16 sigwae, “Caioi, 'aioi, 'asa nage madouna mwalo 'ipasa 'ale'o wasawasa, ma 'ale'o wa'ewa'e'edi ma bwehabwehalidi, ma goula, ta dimwa wasawasa ta 'epo 'oidiyega, 17 'ane tuta 'i'iunamo 'oina ma 'ina wasawasaedi sisawala.”

Ma wete taudi waga taniwagadi, ma'idi to'adau mabwaiyadi, ta ni'u 'ana topaihowao mabwaiyadi, 'edasaliyanega sitotoholo, 18 ma 'asaina 'asuna si'iteya ta sibwauwa, “Mwalo geya 'eta 'asa 'ana 'ita gide 'asa bewa madouna, ta bewa tutaina togidega?”

19 Coinega taudi manidi sigibediya ma sidoudou madouna, sigwaeya, “Caioi, 'aioi, 'asa nage madouna 'oinega to'adau 'idi wasawasa silobediya, ma tuta 'i'iunamo 'oina wasawasaina mabwaiyana sisawala.”

20 Wayaliyaya 'omi galewa Yehoba 'ina loheloheyao, ma wete palopitao, ma 'ana tohepwailao wayaliyaya, weyahina mwalo 'imi muyamuya 'asaina 'oinega walobeya, ma bewa tuwa Yehoba muya 'oinega 'ihemaisediya.

21 Eeta 'aigeda anelose waiwaina dimwa madou hedade 'i'abi haneheya ta holai 'iula suluheya, 'igwaeya, “Casaina madouna Babiloni 'abwa 'ibe'u da'ule bewa gide, ma geya'abwa wete ta'ita'ita hila.

22 “Coinega 'asaina 'ina yaliyaya 'igumwala, ma geya'abwa 'eta 'ebe gihedohedou 'ana hunuwa, nuwana yoguli 'ana mu'a 'ilatulatu.

“Ma wete paihowa 'adi tosanapuwao geya'abwa simiyamiya, ma wete yatu 'ana hesagoha 'igumwala. 23 Eeta mayale 'idi 'asilala 'oina geya'abwa silatulatu. Ma wete geya'abwa tohaiyedi 'enadi 'asaina 'oinega sihehesagohe.

“Moisa, bale'u mabwaiyana 'oina bewa 'asaina 'ana towasawasao sihane hedadeya, ta 'idi 'oba 'oidiyega hali tupwa tomotaidi si'abowediya.

24 “Ma wete mwalo tomota baibaiwadi gide palopitao ta Yehoba 'ina topaihowao silohe'amasidiya 'asaina Babiloni 'oina, ma weyahina 'ana mwau 'ilobeya Yehoba 'oinega.”